Fares Weld Eleulma / فارس ولد العلمة - Fawda / فوضى [tekst, tłumaczenie i interpretacja piosenki]

[اللازمة]
الشعب آو عايش في فوضى و باغي البلاد تتسقّمْ
إذا كاين 10 تبني راي كاينة 100 لي تهدّمْ
في أفعالنا متخلفين ، كيفاش حابين البلاد تتقدّمْ؟
فكما تكونوا ياو سوف يولّى عليكم

[المقطع الأول]
يحكمك الرادار ماشي 220
تدفع شوية رشوة تجيب البيرمي في ساعتين
غدوة وليدك تضربو الطونوبيل في لوطوروت
تقلهم : لو طبقتو القانون لو كان وليدي ما يموت
تبيع السلعة بيريمي و يحكمك الكونترولور
تعطيبو تشيبة صحيحة و يفاصيلك الرابور
غدوة بنتك تموت بكوكسيكاسيون في ليكول
تمسح الموس في القانون و تقول هو المسؤول
نخرج بنتك بلبسة ما فيها لا دين لا حشمة
و جامي لا تسقسيها إذا رجعتلك في الظلمة
و كي تلقاها مخطوفة و تعرضت للاغتصاب
تقول للمسؤولين وين هو قانون العقاب؟
تجي روتار للخدمة و تخرج منها قبل الوقت
زعمة فهامة ولاّ شطارة و أنت في الحقيقة سرقت
كي تروح تخلص تلقى لاشين بلاد طوم و جيري
كون جيت لخدمتك بكري كون جاو تاع البوسطة بكري

[اللازمة]

[المقطع الثاني]
تقعد وسط ولادك و تعمرها في العشا
تنوض تروح ديخان للجامع تصلّي العِشا
توقف في الصف الأول و نتا منفوخ و شبعان
و جارك الباب للبال مع ولادو بايت جيعان
أنت جامي لا خمّمت تروح تتبرّع بالدم
شوية من ، شوية منهيه ، يتنحّى عالمرضى الهم
و نهار لي تحتاجو في السبيطار اك ما تلقاش
تقول الدولة حقرتنا بخلتنا و ما عطاتناش
شكون لي خمّم فيكم كاش نهار يغرس شجرة
تعرفو غير تبنيو ، بالبيطون البلاد ولاّت محجرة
و كي تشوفو في لاتيلي لي كارتي تاع لوروب
تقولو هاي الناس المطورة بعقلية طوب
تروحو للغابات ، لي جاردان ولاّ لي بلاج
تخلفو مزبلة و ما ديروش النيتواياج
بصّح قدّام الباب كون تلقوا زقّة زاوش
تعطيوها بـ لومو ولاّ بـ لاجافيل و ما تنساوش

[اللازمة]

[المقطع الثالث]
الآن افتح ما تبقّى من دمافك الصغير
حتى تفهم المقصود من حقيقة التغيير
هل رأيت يوما أعمى لوّن اللوح المرسوم؟
هل رأيت سمكا يطير في وسط النجوم؟
أو معطوبا يحمل الأثقال يجري في الطريق؟
أو مشلولا خاض بحرا حتّى ينقد العريق؟
أو حكيما يدرس الأخلاق من شخص سفيه؟
إن كنت فاقدا للشيء قلّي كيف ستعطيه؟
حين تفهم الكلام سوف تعرف الحقيقة
التغيير ليس صعبا ، الصعب هي الطريقة
التغيير سلسلة و نحن حلقة صغيرة
فرد ، أسرة ، مجتمع ، و أمّة كبيرة
غيّر الحلقة الأولى في دواخل الإنسان
سوف يصل التغيير حتّى يشمل الأوطان
قبل أن تأمر الناس بالتغيير غيّر نفسك
درسُ سهل يا بنيّ في الحياة فافهم درسك
الشعب عايش في فوضى و باغي البلاد تتسقّمْ
إذا كاين 10 تبني راهي كاينة 100 لي تهدّمْ
في أفعالنا متخلفين ، كيفاش حابين البلاد تتقدّمْ؟
ياو فكما تكونوا سوف يولّى عليكم

[اللازمة]